Punkta der vegen vil bli stengt ligg i Gausdal kommune.
Det eine punktet er ved Ellanhuslia mellom Øvre Svatsum og Helvete. Det andre er ved Bødalen, lenger sør.
Fylkesveg 255 fekk skadar fleire stader etter ekstremveret i august. Ved Ellanhuslia, ca. 2 kilometer sør for Helvete naturpark i Espedalen, raste delar av vegbanen ut. Før arbeidet med å bygge opp att vegen kan byrje for fullt, må fylkeskommunen sin entreprenør gjennomføre grunnboringar for å kartlegge grunntilhøva.
Mens dette arbeidet skjer, blir vegen stengt i perioder på ca. ein halvtime. Arbeidet med grunnboringar startar tysdag 3. oktober og vil vare i to veker, opplyser Innlandet fylkeskommune i ei pressemelding.
Arbeidet påverkar ikkje kollektivtrafikken.
- Anleggsarbeidet blir tilpassa bussane sine rutetider, så busstrafikken kan gå som normalt på fylkesveg 255, opplyser fylkeskommunen.
Når grunnboringane har vorte gjort, skal resultata analyserast, slik at vegeigar kan legge ein plan og
lage ei skildring av det vidare arbeidet med å bygge opp att vegen. Innlandet fylkeskommune opplyser at det kan ta nokre månader før vegen er ferdig reparert.